Donnerstag, 21. Juni 2018

Ëndrrat me kryq

Ai...
Emrin e kishte Bajram
Burrë i fjalës dhe besës

Babai i tij… quhej Ali
E gjyshi – Kadri

Gjithmonë… 
Bajrami i kremtonte 
Festat e Bajramit

Lutej dhe agjëronte 
Si muhamedan

Por... 
Sa herë e zinte gjumi
Ëndrrave bënte kryq
Dhe takohej me Zotin...

1984


Haxhi Muhaxheri

Ajo

Engjëll e djall
mban lidhur
rreth qafe

Kur njëri fle
zgjohet tjetri

Dhe bota 
zvogëlohet
në sytë e saj

Verë e vrarë

Sa herë që vjen vera
Ëndrrave më shfaqesh
Ti moj – si një engjëll
E shpirti flakë më digjet

Na e vranë verën – Vera 
(Eu... ata e vrafshin veten!)
Paçka se...një Zot e kishim
E shqip i luteshim të dy

Tash... S'na mbeti tjetër
Veç t'i kujtojmë netët
Kur fshehtas loznim me yje
E zjarri ndizej brenda nesh

1986


Mittwoch, 13. Juni 2018

Lisi i Babait

Një Lis – babai
Mbjellur e kishte në Plis

Rritjej e rritej Lisi
Ndritej shkëlqente Plisi

Lis në Plis 
E Plis në Lis

Babai udhëtoj qiellit
E Lisi u bë një me diellin

_____
Haxhi Muhaxheri
12.06.2018


Haxhi Muhaxheri

Tradhëtia

Më fal moj grua 
se mbrëm
tradhëtuar të kam 
me fqinjën leshverdhë
që mendsh luan perënditë

Bobo... ç'më bëri shejtanka
shpirtin desh ma nxori 
ëndrrave – gjithë natën

_____
Haxhi Muhaxheri
12.06.2018


Haxhi Muhaxheri

Në Çamëri

Në Çamëri 
sa herë që bie shi – ndizet qielli 
dhe Lumi i Lotëve del nga shtrati

Atje – 
të gjitha lulet
mbajnë erën e gjakut

Në Çamëri – çdo natë 
dëgjohet vaji i fëmijëve
që djepat ua kanë djegur
dhe perëndive u errën sytë

Atje –
më nuk këndohen ninulla
as Vallja e Osmat Takës luhet

Në Çamëri
Sa herë lind dielli
mbijnë lulet e shpresës
dhe ëndrrat përshpirten 
në rrethin e shtatë

Atje –
veç Zoti nuk është zën peng
.............................................
______________
Haxhi Muhaxheri
02.06.2018

Haxhi Muhaxheri

Guri i Nusës

Ajo mezi e kishte pritur ditën
qe të bëhej nuse dhe jo gur, 
sall për t’i dhënë emër 
një legjende!

E zezë dita për krushqit!

Oiii... medet
për Nikollën e Gjinit,
që kurrë s’u bë dhëndër!

Mbi shkëmb vajton një shpend i zi!
____
Haxhi Muhaxheri
Qershor 2018



Këshilla e babait

Babai im, Bajram Ali Muhaxheri
Kurrë mos e shiko
hënën natën – biri im,
sa herë ajo ta fsheh
gjysmën e trupit !

Se...
të zën ethet,
sytë të verbohen
e gjaku të merr erë !
____
Haxhi Muhaxheri
11.06.2018

Sonntag, 10. Juni 2018

Unë dhe deti

Haxhi MUHAXHERI

UNË DHE DETI

Njëri valën
Tjetri fjalën

Valë e fjalë
Fjalë e valë

Valë më valë
Det më fjalë

Freitag, 18. Mai 2018

Bukuria e pritjës

Haxhi Muhaxheri

BUKURIA E PRITJËS

Ti që pamëshirshëm
Përmbys çdo ëndërr
Pse ma shëmtove
Bukurinë e pritjës...
Më thuaj moj – pse...

Unë – sa kisha filluar 
Ta ndjeja frymën e saj
E të kënaqesha – 
Ashtu si robi kënaqet
Me mungesën e Lirisë
Kur shpirti stërkeqet 
N‘kalvarin e durimit...

Dreqi e marrtë
E dashur –
Pse u nxitove 
Pse... 
Kur e dija se një ditë 
Do ta thoshe patjetër
Atë fjalë – të valë
Me peshë sa bjeshka...

Tash – ujk mbetem 
Por mbret s'bëhem dot
Pa e mundur djallin e durimit
Për ta sh'ndrruar më pas
Në lule të kristaltë…
______
Haxhi Muhaxheri
19 mars 2018

Fundi i lojës

Haxhi Muhaxheri

FUNDI I LOJËS

Kur në prehërin e prillit
u shfaq “Fundi i Lojës”,
ëndrrave ju doli gjumi.

Dëshprimin – ia fala detit.

Pastaj – universit të shpirtit
nisi të luhej simfonia hyjnore
dhe Perënditë cakrruan gotat.

Në teatrin absurd – ikën dritat.

21 prill 2018

Është dikush...

Haxhi Muhaxheri

ËSHTË DIKUSH...

Është dikush 
që keq m'ka lidhur.
Ritmin e zemrës
përditë po ma ndërron!

Është dikush që netëve
vjedhur ua ka gjumin...
Më bën... Zotin ta shoh!

Është dikush...dikush është...
Na ndajnë kontinentet,
për t'na bashkuar zemrat!

25.04.2014

Veç për Ty

Haxhi Muhaxheri

KUR VJEN E DIELA...

Të hënën
të dua marrëzisht,
për të urrejtur 
të martën 
… prej dashnisë!

Të mërkurën 
të dua si sytë,
që të enjtën
të urrej sa veten 
… prej syrit të keq!

Të premten 
të dua si jetën,
për të urrejtur
të shtunën –
veç pak 
… prej xhelozisë!

Të dielën...
Oh... kur vjen e diela,
të dua baras me Zotin 
dhe veten e harroj
duke u lutur për Ty!

24. 04. 2018

Veç në ëndrra

Haxhi Muhaxheri

VEÇ NË ËNDRRA

Po ç'dreqin ke... 
Ti që përnatë 
më vjen veç në ëndrra?

Më thuaj – që ta di...

Gjumin ma ke vra' moj
diellin – ma ke nxi‘...!

Freitag, 20. April 2018

Syri i keq

Haxhi Muhaxheri

SYRI I KEQ

Po tutem o Perëndeshë
kam nis shumë me t‘dashtë
e dashnitë e m’dha
shpesh i vret syri i keq!

Të urrej me dashuri

Haxhi Muhaxheri

* * *
Sa shumë të dua, kur filloj me t’urrejtë!
E sa fort të urrej, kur ia nisi me t’dashtë!

Ç’emër t’i jap kësaj historie?
Ç’titull t’i vë kësaj poezie?

Larg...

Haxhi Muhaxheri

Larg...

Sa fort duhemi 
puthemi – pëqafohemi
dalldisemi në ëndrra
malli na përvëlon
kur jemi larg...

Larg kur jemi... 
larg... larg...

18.04.2018

Sonntag, 1. April 2018

Sa herë të vjen kjo ditë


SA HERË TË VJEN KJO DITË

Sa herë të vjen kjo ditë
Do të qajnë vargjet... 
Poetëve do t‘u bie pika
Duke kujtuar – Shitjën 
E gjymtyrëve të atdheut...

Sa herë të vjen kjo ditë
Ëndër kemi për t'i parë
Delet e plagosura
Që shkuan pas ujkut
Dhe Nënë Kosovës 
Do t‘i therin plagët
Marrur prej bijve të saj...

Sa herë të vjen kjo ditë
Perëndeshë ime – 
Vjersha nuk do të shkruajmë
Si më parë... 
Madje – As dashuri s’do bëjmë
Jo për besë...
Se zgjuar janë Vajtojcat e Rekës
E qiellit...
Qiellit flut'rojnë sorrëzezat...
____
Haxhi Muhaxheri
21 mars 2018

Lulet e shpresës

Haxhi Muhaxheri
Të lutem – për atë fjalë 
që peshon sa bjeshka
kurorëzoje buzëqeshjen
me një puthje të ëndërrt

N‘bulëzim dashurie
çjerri të gjitha maskat
harroj lojërat e djallit
por jo Ligjet e Karmës
e ditën e gjykimit

Më pas – Perëndesha ime
shpirtit ngjalli të gjitha stinët
që fushave të blerta 
të çelin lulet e shpresës
____
Haxhi Muhaxheri

Edhe një herë


EDHE NJË HERË

U bën njëzet vjet që Ti 
këndon të njëjtën këngë
sa herë e harron Zotin

E unë...
prapë kërkoj ta përsëritësh 
edhe një herë... edhe një herë
aman... edhe një herë

Mbretin... 
ende nuk e ka zënë gjumi
__
Haxhi Muhaxheri 
04.03.2018

Kreshniku i Lirisë

/ Ismet Jashari /

Thonë se lindur kish me fletë
Thonë se zihej me rrufetë

Thonë se zbriste nga qielli
Sa herë errej dielli
E kur moti prishej në Arbëri 
Ai vriste nga një bajloz të zi

Komandat e thërrisnin
Veten e quante ushtar
Thonë se n’log të mejdanit
Gjithmonë ishte i parë

Thonë se vinta nga legjendat
Kreshnik (I)lirie
Thonë ishte shqiponjë Orizare
E Lis i madh Shqiptarie
_
Orizare - Fshati i lindjës së heroit
Haxhi Muhaxheri, 03.01.2018

Diell në shpirt Lirie

/Dëshmori Fadil Nimani/

Plisin e mbante në zemër
Armët – ngjeshur brezit 
Dhe hartën e kufijve n'sy

Kur terri shfaqej mbi atdhe
Vraponte tehut të shpatës 
Të përballej me kuqedrën

Emri i tij – kurorë lavdie
Shqipinjë e Kosovës
Diell në Shpirt Lirie
____ 
Haxhi Muhaxheri 24.03.2018

Dashuri e urrejtje

Aq shumë të dua – Perëndesha ime
Kam nisë me t'urrejtë prej dashnisë!

Veç Zoti e di ç'po ndodh – veç Ai...!

27.03.2018

Fjala kryeneçe

Ma zbardhe natën
e ditën krejt ma sose 
Ti – e pabindura fjalë
që u trembesh lindjeve

Dreqi e marrtë –
pse ruan virgjërinë
kur e di mirë moj
që jam ujk i moçëm
____
Haxhi Muhaxheri
28.03.2018

Mittwoch, 14. März 2018

Verës, në Ditën e Verës...


Haxhi MUHAXHERI

VERËS, NË DITËN E VERËS...

Ti Verë – veç shpirtit - more krejt çka tjetër deshe nga unë
Pastaj – mallkimet në emër të Krishtit e të Muhamedit
Shëmtuan bukurinë e stinës – plagosën ëndrrat e blerta
E ne vazhdonim lutjet – duke bërë kryq e duke puthur token
Prej frikës së magjive apo të dehur nga opiumi i gënjeshtrave
Pa e kuptuar kurrë fjalën e Zotit – bekimin e tij për dashurinë

Tash – veç kujtimeve – s’ka mbetur asgjë tjetër moj – asgjë
Unazat që moti janë ndryshkur – shpresat janë zverdhur  
Rrugët që i kemi pagëzuar pranverave – kanë ndërruar emër
Janë mbyllur të gjitha shtigjet – vrarë i kanë edhe zogjtë
Qiellit dëgjohen vargjet e poetëve për dashuritë e humbura
E nata veshur ia ka planetit përdhunshëm rrobat e zeza

Sot është Dita e Verës – njerëzit kapin rrezet – shkëlqejnë
Kurse ne mërdhijmë e mërdhijmë – se rrahur na kanë dimrat 
As ngjyrat më nuk i dallojmë – as erën e vjollcave s‘e ndjejmë
E s’kemi zgjidhje tjetër moj – veç të ikim largë e më largë
Tej shtatë maleve e deteve – në Ishullin Eta – atje ku sundon Perëndesha e Egër – të cilës edhe Zoti i bie në gjunjë… 

14 mars 2018

Sonntag, 25. Februar 2018

Kujdes me gratë



Haxhi MUHAXHERI

KUJDES ME GRATË...

Në do ta kalosh 
Urën e Ferrit – fillo ta duash 
një grua të përhënur

Ajo – 
t’i djeg të gjitha stinët

Nëse do ta mësosh 
bukurinë e gënjeshtrës
dashuro një leshverdhë
që qanë e qesh në pasqyrë

Ajo – 
edhe Zotin e mashtron

Në daç veten ta mallkosh
jepi dashurinë një gruaje
Qe puthur e ka zhgënjimin

Ajo – 
do t’i vrasë edhe lutjet

Po deshe të marrësh 
plagë zemre – plagë shpirti
besoi gruas që t’puthë 
me zjarrin shuar buzëve

Ajo – 
mërdhin edhe diellin

Në daç veten ta vrasësh 
beso fjalët e një gruaje
që të thotë – Të dua
pas dimrit të gjatë të pritjes

Ajo – 
lëkurën tënde do ta vesh

23 shkurt 2018

Montag, 19. Februar 2018

Daullet e turpit


Haxhi MUHAXHERI

DAULLET E TURPIT

Sot – horrat me kollare e plisa të bardhë
si për çdo përvjetor - do të vendosin lule
dhe të bëjnë foto tek shtatoret e heronjëve

Sot – do ta kremtojmë lindjen tënde Kosovë
bashkë me ata që t‘kafshuan deri n'palcë
damarët t’i gjymtuan e diellin ta qorruan

Sot – do ta festojmë ditëlindjen Ty Atdhe
tok me kopilat që Gjegjin duan ta dëbojnë
historinë ta vrasin – Flamurin ta ndalojnë

Sot – do të këndojnë e të gëzohen – o Nënë
se po i varrosin ëndërrat e bijëve tu dëshmorë
dhe qiellit ia plagosin shqiponjat n‘fluturim

Sot – do të bien fort daullet e turpit
do të çirren – të çirren e të çirren maskarenjtë 
dhe Lirisë kanë për t’ja nxjerr dhëmbin e syrit

17 shkurt 2018

Pa Shën Valentinin


Haxhi MUHAXHERI

PA SHËN VALENTININ

Në Ishullin Eta 
bëhet dashuri kozmike
dhe s’flitet më për Shën Valentinin

Atje – Perëndeshave 
përditë u jepen Lule Zemre 
e çokollata me lajthi

Atje – të dashuruarit
ushqehen më bioëmbelsira
mjaltë buzësh e reçel fiku

Atje – njerëzit ngrohen 
nga puthjet – përqafimet
ledhatimet e zjarr i dashurisë

Atje – edhe Perënditë japin shpirt 
mes shalëve – në pritje të orgazmës
psherëtimat thurin simfonitë

14 shkurt 2018

Atdheu


Haxhi MUHAXHERI

ATDHEU

Është oqean i vogël 
i trazimit të madh
ku bien heronjtë

Tokë e pushtuar
nga magjia e shkretirës
ku vritet ëndrra e Gjergjit

Është vend prostitutash
veshur me ngjyrat e flamurit
ku lindin kopila që shesin veten

Luadh gomerësh
a mal ujqërish të uritur
që e kafshojnë tinëz Lirinë

Atdheu – 
është plagë zemre 
që po rritet... rritet... e rritet...

4 shkurt 2018

Zogjtë dashurojnë lirshëm


Haxhi MUHAXHERI

ZOGJTË DASHUROJNË LIRSHËM

Zogjtë – janë me të guximshëm se ne
Ata e duan më shumë Lirinë – flut‘rojnë
Këndojnë e hedhin valle kur t‘ju teket
Dhe s’pjerdhin fare për rregulla qeverish

Zogjtë – puthen e bëjnë dashuri lirshëm
Sy botës – në ajër – mes lulesh në tokë
Maje lisash a mbi kulme shtëpish
Dhe kurrë s’çajnë bythën për etikën

Zogjtë – nuk janë kopila të Ajnshtanjit
Ata s’ja varin as Platonit e Aristotelit
Hesiodit e Pitagorës – Niçes a Hegelit
Madje – as biblën e kuranin e kanë lexuar

Zogjtë nuk e dijnë se kur është hëna e plotë
S‘dijnë as çka janë numërat – ëndrrat – magjitë
S‘bëjnë kurrë kontratë martese – sikur ne 
Që veten mashtrojmë dhe i përligjim tradhtitë

Zogjtë na mësojnë – ç’pamje ka Liria
Zogjtë na tregojnë – çka është dashuria
Ata kurrë nuk vuajnë nga mendësia e robit
As hundet i fusin në punët e Zotit

2 shkurt 2018